Приидоша убо некия две жены во святую ту обитель Пречистыя Богородицы, честныя и славныя ея Похвалы, в Черную Гору от веси, нарицаемыя Марьины Горы, растояние имущи от обители яко 100 поприщ и вяще. Имя единой Евфимия, друзей же Феодосия. Евфимия же убо поведа сие преславное чюдо, случившееся ей: «Бывшу ми, — рече, — в болезни 9 месяц и болевшу ми тяжкою немощию, яже наричется щепота. И от немощи тоя разслабишася вси составы тела моего, и никакоже с места своего востати не могущи отнюд. И сице лежащу ми в болезни той лютой долгое время сие. И слухоме слышах бывающая чюдеса преславныя от иконы Пречистыя Богоматере, честнаго ея Одигитрия, иже во обители на Черной Горе. И во уме своем помолившися, лютою болезнью одержима, и обещася ити во обитель Пречистыя Богородицы пеша. О великое и неизследимое милосердие Богоматере! В том часе бысть здрава, якоже никогда болезни имеющи». И слышавше сие преславное чюдо окрест веси тоя живущии людие, и хвалу воздаша Всещедрому Богу и Пречистей его Богоматере.
И возвестиша сие чудо в веси, отстоящей от тоя яко пять поприщ, пореклом наричется Пукшенга, прежереченной жене Феодосии. Сущи ей тогда в недузе своем лежати 14 лет и никакоже со одра своего в та лета воставающи. Слышавши же сие преславное чюдо, возопивши велми во стонании сердца своего умилне: «О Всемилостивая Владычице, помози окаянней страннице в сей тяжкой болезни, избави мя от долголетнаго сего недуга!» И многая моления со слезами изрече. И обещася, рече: «Аще исцелиши мя, Владычице, да иду пеша до честнаго образа твоего». О дивное и несказанное и недоведомое человеческу уму содеяся преславное чюдо! Како от толикия долготныя болезни во едином часе пременися и бысть здрава, якоже николи болезни имевши. О великое милосердия Богоматере и неистекаемы пучины щедроть! Кто может исповедати или изследити, наипачеже в нынешнее конечнее время и в последней роде содеяся таковое великое и неизреченное милосердие Богоматери! И в том часе воставши со одра своего здрава и слезы теплы от радости испущая. И забывшу скорбь, яже преже 14 лет на одре лежащи и никаможе поступающи. Любовию распаляющися, поведающи всем сущим в веси той преславное милосердие Богоматери. И во уме своем помышляше: «Аще бы толик путь единем часом минути». И сия слышавше веси тоя людие, и ужасошася, и радости исполнишася, похвалныя песни Богородицы воздающе, не токмо старии, но и малии младенцы радости исполнившася о сем великом милосердии Божия Матери. И шед к прежереченней жене Евфимии в другую весь, ейже преже бысть исцеление от Пренепорочныя Матери Божия, от чюдотворныя ея иконы, и поведавшие ей свою немощь, еже бысть в четыренадесяти летех, и како исцеление получи помощию Пресвятыя Богородицы. И согласистася, поидоша пеши к доброй исцелительницы во обитель Пресвятыя Богоматере, к чюдотворней ея иконе. Егда достигоша радостию обители тоя и возвестиша преславное сие чюдо строителю святаго места того и братии, каяждо свое исцеление. И молебное совершивше, и любезно целовавши радостию, и со слезами обливающеся, благодарение воздающи Всещедрому в Троице славимому Богу и Пречистей его Богоматери. И отъидоша в домы своя, поведающе преславное свое исцеление во всякой веси. Сия убо мы видевше, недостойнии, своима очима и слышахом от уст тех жен истинное их исцеление и велию веру ко Пречистей Божии Матери. И со слезами умилне зряще на Пречистыя ея лица зрак, вопиюще: «О Пренебесная Царица, Богородице Марие, светоприемнице божественнаго света, вместилище и престол Божияго слова, пророческое зерцало, апостольская проповедь, мучеником страдания, венче святителем, похвала преподобным, светлое песнословие, и помощнице праведным, и всем святым ликование, вселенских церквей чюдная похвало, царем православным держава непобедимая, архиереем светлый венче, и всего православнаго християнства божественный покрове и помощнице, всяческих зол избавление, и грехом разрешение, и вечному животу наставнице и божественный ходатай! Даруй убо, о Владычице Богомати, заступление и помощь светло и радостне почитающим твоя неизреченная и дивная проповедати чюдеса честныя твоея Богородичны иконы на спасение и заступление последним родом, и алчющая сердца наша напитай небесною пищею, и веселия духовнаго исполни, и смирение даруй в мыслех наших, и страх Божий всади в сердца наша, и любовь нелицемерну утверди в душах наших, и на всяк путь божественных заповедей настави, еже ходити по заповедем Сына твоего, Господа нашего Иисуса Христа, емуже слава всегда, ныне и присно и во веки веков! Аминь.