И мо́лится свяще́нник:
Оте́ц, Сы́н, и святы́й ду́х, всесвята́я, и единосу́щная, и живонача́льная Тро́ица, еди́но Божество́ и Ца́рство, да благослови́т ва́с, и да пода́ст ва́м долгожи́тие, благоча́дие, преспе́яние живота́ и ве́ры, и да испо́лнит ва́с все́х су́щих на земли́ благи́х: да сподо́бит ва́с и обеща́нных бла́г восприя́тия, моли́твами святы́я Богоро́дицы, и все́х святы́х, ами́нь.
Та́же вхо́дят, и поздравля́ют и́х, и целова́ние дру́г дру́га, и быва́ет от свяще́нника соверше́нный отпу́ст.
Ре́кшу диа́кону: Прему́дрость.
Ли́к: Честне́йшую херуви́м:
Свяще́нник отпу́ст:
И́же в ка́не галиле́йстей прише́ствием свои́м че́стен бра́к показа́вый, Христо́с и́стинный Бо́г на́ш, моли́твами пречи́стыя своея́ ма́тере, святы́х сла́вных и всехва́льных апо́стол, святы́х боговенча́нных царе́й и равноапо́столов, константи́на и еле́ны, свята́го великому́ченика проко́пиа, и все́х святы́х, поми́лует и спасе́т на́с, я́ко бла́г и человеколю́бец.
Глава 11. Моли́тва на разреше́ние венце́в, во осмы́й де́нь
Го́споди Бо́же на́ш, вене́ц ле́та благослови́вый, и сия́ венцы́ возложи́ти преда́вый зако́ном бра́ка, сочетава́ющымся дру́г дру́гу, и мзду́ а́ки отдая́ и́м целому́дрия: зане́ чи́сти ко и́же от Тебе́ узаконоположе́нному бра́ку сочета́шася: са́м и в разреше́нии си́х венце́в, сочета́вшихся дру́г дру́гу благослови́, и сочета́ние и́х нерастерза́емо соблюди́: да благодаря́т вы́ну всесвято́е и́мя твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.
Свяще́нник: Ми́р все́м.
Согла́сная дости́гше раби́ твои́ Го́споди, и после́дование соверши́вше в ка́не галиле́йстей бра́ка, и спря́тавше я́же в не́м зна́мения, сла́ву тебе́ возсыла́ют, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
И отпу́ст.
Глава 12. После́дование о двобра́чном
Свяще́нник начина́ет. Благослове́н Бо́г на́ш. Та́же, Трисвято́е: По О́тче на́ш: Тропа́рь дне́вный.
Та́же, ектениа́: Ми́ром Го́споду помо́лимся.
О свы́шнем ми́ре:
О ми́ре всего́ ми́ра:
О святе́м хра́ме се́м:
О рабе́х Бо́жиих, и́мярек и и́мярек, и е́же о Бо́зе покро́ве, и сожи́тии и́х, Го́споду помо́лимся.
О е́же спожи́ти и́м до́бре во единомы́слии Го́споду помо́лимся.
Заступи́, спаси́, поми́луй:
Пресвяту́ю, пречи́стую, преблагослове́нную:
Я́ко подоба́ет тебе́:
Та́же, Го́споду помо́лимся.
Свяще́нник моли́тву:
Бо́же ве́чный, разстоя́щаяся собра́вый в соедине́ние, и сою́з любве́ положи́вый и́ма неразруши́мый: благослови́вый Исаа́ка и реве́кку, и насле́дники я́ твоего́ обетова́ния показа́вый: са́м благослови́ и рабы́ твоя́ сия́, и́мярек и и́мярек, наставля́я и́х на вся́кое де́ло благо́е.
Я́ко ми́лостив и человеколю́бец Бо́г еси́, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Свяще́нник: Ми́р все́м.
Диа́кон: Главы́ ва́шя Го́сподеви приклони́те.
Свяще́нник моли́тву:
Го́споди Бо́же на́ш, от язы́к предъобручи́вый це́рковь, де́ву чи́сту, благослови́ обруче́ние сие́, и соедини́, и сохрани́ рабы́ твоя́ сия́ в ми́ре и единомы́слии.
Тебе́ бо подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Та́же взе́м свяще́нник пе́рстни, дае́т пе́рвее му́жу златы́й, жене́ же сре́бряный, и глаго́лет му́жу:
Обруча́ется ра́б Бо́жий, и́мярек, рабе́ Бо́жией и́мярек, во и́мя Отца́, и Сы́на, и Свята́го Ду́ха, ами́нь.
Подо́бне и жене́:
Обруча́ется раба́ Бо́жия, и́мярек, рабу́ Бо́жию, и́мярек, во и́мя отца́ и Сы́на, и Свята́го Ду́ха, ами́нь.
И твори́т кре́ст пе́рстнем на глава́х и́х, и налага́ет я́ на десны́я пе́рсты. Та́же изменя́ет пе́рстни новоневе́стных восприе́мник.
Посе́м диа́кон: Го́споду помо́лимся.
Свяще́нник моли́тву:
Влады́ко Го́споди Бо́же на́ш, все́х щадя́й, о все́х промышля́яй, та́йная ве́дый челове́ческая, и все́х ве́дение име́яй, очи́сти грехи́ на́шя, и беззако́ние прости́ твои́х рабо́в, призыва́яй я́ в покая́ние, подая́ и́м проще́ние прегреше́ний, грехо́в очище́ние, проще́ние беззако́ний во́льных же и нево́льных, ве́дый немощно́е челове́ческаго естества́, созда́телю, и соде́телю: и́же раа́ву блудни́цу прости́вый, и мытаре́во покая́ние прие́мый, не помяни́ грехо́в на́ших неве́дения от ю́ности. а́ще бо беззако́ния на́зриши Го́споди, Го́споди, кто́ постои́т тебе́? или́ ка́я пло́ть оправди́тся пред тобо́ю, ты́ бо еди́н еси́ пра́веден, безгре́шен, свя́т, многоми́лостив, многоблагоутро́бен, и ка́яйся о зло́бах челове́ческих. ты́ Влады́ко, присво́ивый рабы́ твоя́, и́мярек, и́мярек, соедини́ к дру́г дру́гу любо́вию: да́руй и́м мытаре́во обраще́ние, блудни́цы сле́зы, разбо́йниче испове́дание: да покая́нием от всего́ се́рдца своего́, во единомы́слии и ми́ре за́поведи твоя́ де́лающе, сподо́бятся и небе́снаго твоего́ Ца́рствия.