Прииди́те вну́цы Ада́мовы, уви́дим на земли́ пове́рженнаго, по о́бразу на́шему все́ благоле́пие отлага́юща, разруше́на во гро́бе гно́ем, червьми́, тьмо́ю иждива́ема, земле́ю покрыва́ема. его́же неви́дима оста́вльше, Христу́ помо́лимся, да́ти во ве́ки сему́ упокое́ние.
Егда́ душа́ от те́ла и́мать ну́ждею восхи́титися стра́шными а́нгелы, все́х забыва́ет сро́дников и зна́емых, и пече́тся о бу́дущих суди́лищей стоя́нии, я́же суеты́, и многотру́дныя пло́ти разреше́нии: тогда́ судию́ моля́ще, вси́ помо́лимся, да прости́т Госпо́дь, я́же соде́ла.
Прииди́те бра́тие, во гро́бе у́зрим пе́пел и пе́рсть, из нея́же созда́хомся. ка́мо ны́не и́дем? что́ же бы́хом, ки́й убо́г или́ бога́т? или́ ки́й Влады́ка? ки́й же свобо́дь? и не вси́ ли пе́пел? добро́та лица́ согни́, и ю́ности ве́сь цве́т увяди́ сме́рть.
Вои́стинну суета́ и тле́ние, вся́ жите́йская, ви́ды, и безсла́вная: вси́ бо исчеза́ем, вси́ у́мрем, ца́рие же и кня́зи, судии́ и наси́льницы, бога́тии и убо́зии, и все́ естество́ челове́ческое: ны́не бо, и́же иногда́ в житии́, во гро́бы верга́ются, и́хже да упоко́ит Госпо́дь, помо́лимся.
Вси́ теле́снии ны́не орга́ны пра́здни зря́тся, и́же пре́жде ма́ла дви́жими бя́ху, вси́ недействи́тельни, ме́ртви, нечу́вственни: о́чи бо заидо́ша, связа́стеся но́зе, ру́це безмо́лвствуете, и слу́х с ни́ми: язы́к молча́нием заключи́ся, гро́бу предае́тся. Вои́стинну суета́ вся́ челове́ческая.
Спаса́й наде́ющыяся на тя́, ма́ти незаходи́маго со́лнца богороди́тельнице: умоли́ моли́твами твои́ми преблага́го Бо́га, упоко́ити, мо́лимся, ны́не преста́вльшагося, иде́же упокоева́ются пра́ведных ду́си: Боже́ственных бла́г насле́дника покажи́, во дво́рех пра́ведных, в па́мять, всенепоро́чная, ве́чную.
Сла́ва, гла́с 6:
Зря́ще мя́ безгла́сна, и бездыха́нна предлежа́ща, воспла́чите о мне́ бра́тие и дру́зи, сро́дницы и зна́емии: вчера́шний бо де́нь бесе́довах с ва́ми, и внеза́пу на́йде на мя́ стра́шный ча́с сме́ртный: но прииди́те вси́ лю́бящии мя́, и целу́йте мя́ после́дним целова́нием: не ктому́ бо с ва́ми похожду́, или́ собесе́дую про́чее. к судии́ бо отхожду́, иде́же не́сть лицеприя́тия: ра́б бо и влады́ка вку́пе предстоя́т, ца́рь и во́ин, бога́тый и убо́гий в ра́внем досто́инстве: ки́йждо бо от свои́х де́л, или́ просла́вится, или́ постыди́тся. но прошу́ все́х и молю́, непреста́нно о мне́ моли́теся Христу́ Бо́гу, да не низведе́н бу́ду по грехо́м мои́м, на ме́сто муче́ния: но да вчини́т мя́, иде́же све́т живо́тный.
И ны́не, богоро́дичен, гла́с то́йже:
Моли́твами ро́ждшия тя́ Христе́, и предте́чи твоего́, апо́столов, проро́ков, иера́рхов, преподо́бных, и пра́ведных, и все́х святы́х, усо́пшаго раба́ твоего́ упоко́й.
Та́же, Трисвято́е. Пресвята́я Тро́ице: О́тче на́ш:
Свяще́нник: Я́ко твое́ е́сть Ца́рство:
Та́же, Со ду́хи пра́ведных: И про́чее.
Проше́ние от диа́кона: Поми́луй на́с Бо́же, по вели́цей ми́лости твое́й: По возгла́се же,
Сла́ва, и ны́не:
И отпу́ст:
Воскресы́й из ме́ртвых, Христо́с и́стинный Бо́г на́ш, моли́твами пречи́стыя своея́ ма́тере, святы́х сла́вных и всехва́льных апо́стол, преподо́бных и богоно́сных оте́ц на́ших, и все́х святы́х, ду́шу от на́с преста́вльшагося раба́ своего́, и́мярек, в селе́ниих пра́ведных учини́т, в не́дрех Аавраа́ма упоко́ит, и с пра́ведными сопричте́т, и на́с поми́лует, я́ко бла́г и человеколю́бец. Ами́нь.
Архиере́й же или́ нача́льствуяй иере́й са́м глаго́лет три́жды сие́:
Ве́чная твоя́ па́мять, достоблаже́нне и приснопа́мятне бра́те на́ш. Три́жды.
Та́же певцы́ пою́т три́жды:
Ве́чная па́мять.
А́бие же архиере́й, а́ще приключи́тся та́мо бы́ти, или́ иере́й чте́т моли́тву проща́льную велегла́сно:
Госпо́дь Иису́с Христо́с Бо́г на́ш, и́же Боже́ственная за́поведи святы́м свои́м ученико́м и апо́столом да́вый, во е́же вяза́ти и реши́ти па́дших грехи́, и от о́ных па́ки мы́ прие́мше вины́ то́йже твори́ти: да прости́т тебе́, ча́до духо́вное, а́ще что́ соде́лал еси́ в ны́нешнем ве́це во́льное или́ нево́льное, ны́не и́. при́сно, и во ве́ки веко́в, ами́нь.
И та́ко взе́мше мо́щи отхо́дим ко гро́бу после́дующым все́м лю́дем, предъиду́щым же свяще́нником, и пою́щым: Святы́й Бо́же: Пресвята́я Тро́ице: О́тче на́ш: И про́чая.
И полага́ются мо́щи во гро́б: архиере́й же, или́ свяще́нник, взе́м пе́рсть лопа́тою, крестови́дно ме́щет верху́ моще́й, глаго́ля:
Госпо́дня земля́, и исполне́ние ея́ вселе́нная, и вси́ живу́щии на не́й.
И посе́м налива́ет верху́ еле́й от канди́ла, или́ сы́плют пе́пел от кади́льницы, и та́ко покрыва́ют я́ко обы́чно гро́б, приглаго́лемым тропаре́м: Со ду́хи пра́ведных: и про́чым все́м.