Сла́ва: Пре́жде иску́са земны́х сла́достей, прия́л еси́ Христе́ спа́се, непоро́чнаго младе́нца, ве́чных сподобля́яй благи́х, я́ко человеколю́бец.
И ны́не: Прему́дрость и сло́во о́тчее неизрече́нно ро́ждшая, души́ моея́ лю́тую исцели́ я́зву, и серде́чную боле́знь укроти́.
Пе́снь 3.
Ирмо́с: Небе́снаго кру́га верхотво́рче Го́споди, и це́ркве зижди́телю, ты́ мене́ утверди́ в любви́ твое́й, жела́ний кра́ю, ве́рных утвержде́ние, еди́не человеколю́бче.
Припе́в: Го́споди упоко́й младе́нца.
Пресоверше́нный сло́ве, Младе́нц яви́выйся соверше́нный, младе́нца несоверше́нна во́зрастом к себе́ преста́вил еси́: его́же упоко́й с пра́ведными все́ми благоугоди́вшими тебе́, еди́не человеколю́бче.
Мирски́х сла́достей не вкуси́вша восхище́на преми́рных ще́дре благи́х прича́стника покажи́, мо́лимся, нерастле́ннаго Младе́нца, его́же преложи́л еси́ Боже́ственным повеле́нием твои́м.
Сла́ва: Небе́сных черто́гов, и све́тлаго поко́я, и свяще́ннейшаго ли́ка святы́х, Го́споди прича́стника сотвори́ чисте́йшаго младе́нца, его́же я́ко благоволи́л еси́ спа́се, преста́вил еси́.
И ны́не: Лиши́выйся от все́х, к твоему́ пречи́стая Влады́чице и еди́ному прибега́ю покро́ву, помози́ ми: мно́гое бо совокупи́х грехо́вное бога́тство, доброде́телей же нището́ю ве́сь испо́лнихся.
Та́же, ирмо́с: И по ирмосе́ свяще́нник глаго́лет ектению́ сию́:
Па́ки и па́ки ми́ром Го́споду помо́лимся.
Ли́к: Го́споди поми́луй.
Еще́ мо́лимся о упокое́нии блаже́ннаго младе́нца, и́мярек, и о е́же по нело́жному своему́ обеща́нию, небе́сному своему́ Ца́рствию того́ сподо́бити.
Ли́к: Го́споди поми́луй, три́жды.
Я́ко да Госпо́дь Бо́г на́ш учини́т ду́х его́, иде́же вси́ пра́веднии почива́ют.
Ли́к: Го́споди поми́луй, три́жды.
Ми́лости Бо́жия, Ца́рства Небе́снаго и со святы́ми упокое́ния, у Христа́ безсме́ртнаго Царя́ и Бо́га на́шего тому́, и са́ми себе́, про́сим.
Ли́к: Пода́й Го́споди. Свяще́нник: Го́споду помо́лимся.
Ли́к: Го́споди поми́луй.
Го́споди Иису́се Христе́ Бо́же на́ш, породи́вшымся от воды́ и ду́ха, и в непоро́чном житии́ к тебе́ преставля́ющымся Ца́рство небе́сное да́ти обеща́вый, и реки́й: оста́вите де́ти приходи́ти ко мне́, таковы́х бо е́сть Ца́рство небе́сное. смире́нно мо́лимся, ны́не от на́с преста́вленному рабу́ твоему́ непоро́чному младе́нцу, и́мярек, по твоему́ нело́жному обеща́нию, Ца́рствия твоего́ насле́дие да́руй: на́с же безпоро́чное сподо́би прейти́, и Христиа́нское сконча́ти житие́, со все́ми святы́ми твои́ми, в небе́сных черто́зех водвори́тися.
И возглаша́ет: Я́ко ты́ еси́ воскре́сние, живо́т и упокое́ние все́х рабо́в твои́х, и ны́не преста́вленному рабу́ твоему́ младе́нцу, и́мярек, Христе́ Бо́же на́ш, и тебе́ сла́ву возсыла́ем со безнача́льным твои́м отце́м, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.
Ли́к: Ами́нь.
Та́же, тропа́рь:
Вои́стинну суета́ вся́ческая, житие́ же се́нь, и со́ние: и́бо всу́е мяте́тся вся́к земноро́дный, я́коже рече́ писа́ние: егда́ ми́р приобря́щем, тогда́ во гро́б всели́мся, иде́же вку́пе ца́рие и ни́щии, ста́рцы и младе́нцы. те́мже Христе́ Бо́же, преста́вльшагося младе́нца упоко́й, я́ко человеколю́бец.
Пе́снь 4.
Ирмо́с: Услы́шах Го́споди смотре́ния твоего́ та́инство, разуме́х дела́ твоя́, и просла́вих твое́ Божество́.
Припе́в: Го́споди, упоко́й младе́нца.
Не младе́нцы пла́чем, но са́ми себе́ наипа́че возрыда́им согреша́ющии всегда́, я́ко да гее́нны изба́вимся.
Земны́х лиши́л еси́ Влады́ко младе́нца наслажде́ний, небе́сных благи́х сего́ я́ко правосу́дец сподо́би.
Сла́ва: Рая́ жи́теля тя́ показу́ет, блаже́нный вои́стинну младе́нче, и́же от земли́ тя восприи́мый, и лико́м святы́х счиня́ет тя́.
И ны́не, богоро́дичен: Богоро́дицу тя́ всечи́стая просвеще́ннии вси́ ве́мы, со́лнца бо родила́ еси́ пра́вды, Присноде́во.
Пе́снь 5.
Ирмо́с: Вску́ю мя́ отри́нул еси́, от лица́ твоего́ све́те незаходи́мый, и покры́ла мя́ е́сть чужда́я тьма́ окая́ннаго? но обрати́ мя, и к све́ту за́поведей твои́х пути́ моя́, напра́ви молю́ся.
Припе́в: Го́споди, упоко́й младе́нца.
Пра́ведным твои́м судо́м, пре́жде прозябе́ния, соверше́нне пожа́л еси́, я́коже млады́й зла́к, его́же преста́вил еси́ Го́споди младе́нца: но сего́ сло́ве вве́д в Боже́ственную го́ру бла́г ве́чных, насади́.
Я́коже мла́до ве́твие, ме́чь наше́д сме́ртный тя́ посече́, не прии́мшаго иску́са мирски́х сласте́й, о блаже́нне: но се́ Христо́с тебе́ небе́сная врата́ отверза́ет, избра́нным сочетава́я тя́, я́ко благоутро́бен.