Та́же, Бу́ди и́мя Госпо́дне благослове́но: три́жды.
И псало́м 33: Благословлю́ Го́спода на вся́кое вре́мя.
И пре́жде пи́вше освяще́нную во́ду, взе́млем от свяще́нника анти́дор.
И быва́ет соверше́нный отпу́ст:
И́же во Иорда́не крести́тися изво́ливый от Иоа́нна, на́шего ра́ди спасе́ния, Христо́с и́стинный Бо́г на́ш, моли́твами пречи́стыя своея́ ма́тере, и все́х святы́х, поми́лует и спасе́т на́с, я́ко бла́г и человеколю́бец.
[глава 23] Моли́твы в нача́ле поста́ святы́я четыредеся́тницы
я́же свяще́нник свои́м парохиа́ном в понеде́льник пе́рвый свята́го вели́каго поста́ или́ во ины́й де́нь пе́рвыя по́стныя седми́цы, в це́ркви по у́трени, или́ по часе́х, взе́м на себе́ епитрахи́ль, чте́т моли́твы сия́ со вся́ким умиле́нием
Го́споду помо́лимся.
Наде́яние все́м конце́м земли́, и су́щым в мо́ри дале́че, Бо́же, пронареки́й святы́я дни́ сия́ по́стныя зако́ном и проро́ки, и евангели́сты, сподо́би все́х в чистоте́ тече́ние по́стное прейти́, ве́ру неразлу́чну соблюсти́, и за́поведи твоя́ сохрани́ти во вся́ дни́ живота́ на́шего. А́нгелу ми́рну запове́ждь соблюда́ти вхо́ды на́шя и исхо́ды на вся́кое де́ло благо́е и спослу́шающу, и соугожда́ющу к соверше́нному причаще́нию пречи́стых твои́х та́ин. Приими́ же Влады́ко, коле́нное поклоне́ние и по́ст рабо́в твои́х, подая́ и́м благослове́ние духо́вное, и все́м на́м, о Христе́ Иису́се Го́споде на́шем: с ни́мже благослове́н еси́, с пресвяты́м, и благи́м и животворя́щим твои́м ду́хом, ны́не и при́сно, и во ве́ки веко́в, ами́нь.
Моли́тва втора́я тому́жде.
Го́споду помо́лимся.
Благослове́н еси́ Го́споди вседержи́телю, Бо́же оте́ц на́ших, Аавраа́мов и Исаа́ков и Иа́ковль, сотвори́вый не́бо и зе́млю, мо́ре и вся́ су́щыя в ни́х, положи́вый челове́ком покая́ние во спасе́ние, и презира́яй и́х прегреше́ния: приимы́й сле́зы раба́ твоего́ Дави́да проро́ка, и да́вый ему́ оставле́ние грехо́в ка́ющемуся: манасси́и у́зами желе́зными свя́заннаго, покая́нием же испове́давшагося тебе́ моли́тву приимы́й, и грехи́ его́ оста́вивый: блудни́цу, позна́вшую ми́лость твою́ и схо́дники прии́мшую, и с ми́ром пусти́вшую, спасы́й: услы́ши ны́не моле́ние мене́ недосто́йнаго раба́ твоего́, и пре́зри вся́ согреше́ния си́х рабо́в твои́х, в покая́нии к тебе́ прибега́ющих: и да́ждь и́м серде́чное сокруше́ние, и боле́знь о гресе́х, и́миже тебе́ творца́ своего́ прогне́ваша, могу́щую и́х от грехо́в очи́стити. Да́ждь и́м благода́ть твою́, я́ко да то́ю возбужда́еми и подкрепля́еми, в па́мять зла́я своя́ дела́ приведу́т, и сия́ вся́ во стра́се твое́м духо́вному своему́ отцу́, от Тебе́ же уста́вленному судии́, и́стинно испове́дят: и са́ми на себе́ я́ко на ви́нных в се́рдце сокруше́нном и смире́нном пои́мствовати, и ка́ятися, и жале́ти себе́ о ни́х, и соверше́ннаго проще́ния, и от ни́х разреше́ния твои́м милосе́рдием чрез и́х духовника́, твоего́ же судию́, по нело́жному твоему́ обеща́нию сподо́би. Ты́ бо ре́кл еси́: е́же а́ще разрешите́ на земли́, бу́дет разреше́но на небесе́х. Е́й, Влады́ко Го́споди Иису́се Христе́ Бо́же на́ш, приими́ рабы́ твоя́, ка́ющыяся о свои́х гресе́х ве́домых и неве́домых, во́льных и нево́льных: и сия́ испове́дати по твоему́ повеле́нию предложи́вших, и твое́ю си́лою и благода́тию прии́м и́х ми́лостивно, укрепи́, е́же ктому́ не возврати́тися и́м ко греху́, и к злы́м и неподо́бным дело́м, в ни́хже мно́гажды впадо́ша: но воздви́гни и заступи́ и́х от ко́зней диа́вольских, и от все́х се́тей неприя́зненных: я́ко да без препя́тия послу́жат ти́ в преподо́бии и пра́вде, во вся́ дни́ живота́ своего́. Ты́ бо еси́ Бо́г на́ш, в ми́р прише́дый, не пра́ведных призва́ти, но гре́шных на покая́ние: и се́дмьдесят кра́т седмери́цею впа́дающым во гре́х оставля́ти согреше́ния повеле́вый. Я́коже у́бо жену́ в прелюбодея́нии я́тую, фарисе́йми искуша́ющими тя́ приведе́нную не осуди́л еси́, но ми́лостивно ре́кл еси́: иди́, и отсе́ле ктому́ не согреша́й: и си́х не осужда́й, но человеколю́бно поми́луй. И я́коже и другу́ю блудни́цу пла́чущуюся, и слеза́ми но́зе твои́ омы́вшую, и главы́ своея́ власы́ оте́ршую, поми́ловал еси́ ми́лости твоея́ ра́ди, пода́ждь и си́м рабо́м твои́м невозбра́нныя и те́плыя во и́стинном покая́нии сле́зы. утверди́ и́х у́м и се́рдце, зна́ти тебе́ еди́наго и́стиннаго Сы́на Бо́жия, взе́млющаго грехи́ ми́ра. Приими́ и́х я́коже Петра́ отве́ргшагося тебе́ и покая́нием и го́рькими слеза́ми обра́щшагося прия́л еси́: простри́ десни́цу твою́, и приими́ и́х, я́коже того́ в мо́ри утопа́ющаго прия́л еси́, и укрепи́ и́х на борю́щаго и́х диа́вола: очи́сти и́х ду́шу и те́ло от вся́кия скве́рны. Са́м бо ре́кл еси́ благи́й Го́споди, не тре́бовати здра́вым врача́, но боля́щым: и прише́л еси́ не спаса́емых спасти́, но погиба́ющих. Да́ждь у́бо Го́споди Иису́се Христе́ Бо́же на́ш рабо́м твои́м си́м, сконча́ти без поро́ка нача́тый се́й святы́й по́ст, и в не́м твоя́ за́поведи исполня́ти, в моли́твах же прилежа́ти и все́ми доброде́тельми тебе́ во вся́ дни́ живота́ своего́ благоугожда́ти: я́ко да в чи́стой со́вести причасти́тися неосужде́нно твоему́ Боже́ственному те́лу, и животворя́щей кро́ви излия́нной за ве́сь ми́р во оставле́ние грехо́в, сподо́бятся, и да победя́т и посра́мят диа́вола на ни́х вою́ющаго. Ты́ бо еси́ Бо́же Бо́г ка́ющихся, не хотя́й сме́рти гре́шнаго, но е́же обрати́тися, и жи́ву бы́ти ему́. Не хо́щеши бо Влады́ко, созда́ние твои́х ру́к погуби́ти, ниже́ благоволи́ши о поги́бели челове́честей: но хо́щеши все́м спасти́ся, и в ра́зум и́стинный приити́. те́мже и ны́не Влады́ко, не отврати́ лица́ твоего́ от ра́б твои́х си́х, но да́ждь и́м и́стинное от грехо́в к тебе́ обраще́ние, и от все́х де́л лука́вых избавле́ние: и сподо́би все́х на́с в ми́ре испо́лненных де́л благи́х доити́, и поклони́тися спаси́тельным твои́м страсте́м, и свято́му воскре́снию, и на кончи́не живота́ на́шего ра́дости ве́чныя со все́ми тебе́ благоугоди́вшими получи́ти, в тебе́ Бо́зе и спаси́теле на́шем. Ты́ бо еси́ Бо́г ми́лостей и щедро́т, и человеколю́бия, и тебе́ сла́ву возсыла́ем, со безнача́льным твои́м отце́м, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в, ами́нь.