51. Златоустаго, на умовение ног
Предстояху же ему Михаил и Гавриил[397],
И все воинство небесных сил.
52. Златоустаго, в Великий пяток
Криле богопротивления его исторгнет
И насилие мучения его разсыплет.
53. Григория Нисскаго [398] .
Победительная возглашаху,
Повиннии неповиннаго судяху.
Како оставил еси, владыко, еже на них не изнести томление?
Зриши бо, в кое произыдоша страстование! —
На праведнаго неправду сплетоша,
На жизнь смертоносен суд изнесоша,
Яко ниже на скверноубийственных устремитися,
Ниже к разрушению отлучитися,
Подвиги разделевающи,
Паче же много множайшая сих восприемлющи;
Внутрь въводиму и судиму, того да пожидаюгди,
Како исходящих смотряющи,
Убо что виновен муж сей глаголюще.
Что страшное се соборище?
Сице зло страдати о таковом, молчащи,
Похотения страждущаго не творити, хранящи
Непреподобных оплевания,
Божественней ланите заушения.
Ложною багряницею оболчена зрети терпяше,
Егда на водное заколение отлучившаяся зряше,
Тщаливно смерти крест водрузивше,
Убийственным изволением подложивше;
Бесчестием болезным и душу уязвляше,
Лютейшия слезы от очию терпеливне извождаше.
Предстоящих досаждения,
Тмами скверноубийственных поношения
Обнажиша сладчайшую мою красоту,
Уязвиша уды, пречистую мою сохранша чистоту.
Различными цветы честне вас украсивый,
Иже тмами благопотребства вас прикрывый,
Како страшное се понесу зрение,
Еже всем, страстей ради, устроенное спасение?
Се бо бе то и от желания просимо,
Еже и вещание любимейшаго произносимо,
Хождение совершенное,
Желание недоуменное,
Высокое и преславное послушание,
Еже к нему тоя красование
Быти же, со многими неведомыми возвещающа
И рождения долг исполняюща;
Внегда в руце своего родителя дух предаяше,
Како хотят быти, смотряше.
Многими же нарицанми любимаго призываше,
Сице же, слезы точащи, привещеваше,
Ни бо есть заступаяй,
Ни един помогаяй.
54. Златоустаго, о распятии Христове
Ришущим — скорость,
Воином — храбрость.
Лепо бо есть хотящему диявола победити,
Носити на врага победу, и тем того обличити.
55. Златоустаго, в святую и Великую суботу
Како можаху противу царем и князем, и народом стати,
Бесчисленныя по вся дни смерти приимати?
Но обаче злоба любоперива бывает
Безстудна и безсловесными начинает.
56. Григория Богослова, на святую Пасху
Яко и благодействуеми от него,
Последи отгнаша его.
Не токмо сия укаряет,
Но и начало сим отрицает.
57. На святую Пасху
За единовластие жидовствующе,
Ли множества ради еллинствующе,
Ниже паче сих простираетъся,
Но обаче во обоих подобие обретаетъся.
Не токмо содеяша злобу,
Яко противни богу.
Еже бо не довлеаше токмо своим видением еже двизатися,
Но подобаше благому излиятися.
Но и друг другу примешаютъся
Или по своем естестве похваляютъся.
Различных убо есть струн сочланение
Согласующим же обаче во единаго гласа згуждение,
Еже многообразнаго видения разумение.
Се же есть, еже своего естества узнание,
Еже мнитца убо, услаждая,
Сущему же в причастии злых причастника устраяя.
Отверзостася очи телеснии и страсти подвигошася,
Разумеша, яко нази суть, и усрамишася.
Когда же убо побеждаху,
Когда же ли и побеждаеми бываху,
Неудобь преложения бяху, —
На прелюбодействие дерзаху,
Клятву преступоваху,
Идолом служаху,
Яко прежде человецы менше согрешающе
И пророки люди наставляющи:
Не токмо по образу божию быти человек глаголетъся,
Но и образ божий от писаний именуетъся.
Да аз причащуся Егове полности,
Что богатство и обилие благости.
Они бо вся законная; по писмени разумеют
И ничто же духовна приемлют.
Не токмо не повинет, но и уязвит
Безстуднейших, недугующих во гресех сотворит.
Яко же Моисей людем закон заповедываше,
О нем же и бог пророком Иеремией глаголаше;
Ли по благаго оскудению,
Или по злаго приложению,
К мужеству убо яростию поущаем,
К благаго же причастию похотию возвышаем.
Перво устремление злаго потребляется,
Истиннаго ради агньца отвращается,
Нездраве ниже праве помышляюще,
Безсловесне ярящеся и похотевающе.
В настоящем сем житии воспоминается,
В будущем же жизнь является.
Сапози на ногах,
Иже зли души в руках.
Речено Исайей: горе дом к дому совокупляющим
И село к селу приближающим.
Высока человека непщевати страждущаго,
Спасати нас не могущаго.
Сотворив себе други от убогия от мамоны неправедныя,
Се есть египетския сосуды златыя и сребреныя,
Таковый идолы отца да украдет,
Мирская страстная мечтания от души да отвержет.
Нощию и днем пустыня ти укротится,
Море ти ся разступит, фараон потопится.
Диявол бо, уязвляя греха ради, смерти предаваше,
Смерть же аду умирающаго отсылаше.
Иерусалим будет попираем от язык,
Дондеже убо исполнятся времена язык.
Разумей, яко его ради страждеши,
В наслаждение неприпадаемых благ внидеши.
Светом божества мир просвещающи,
От тмы греховныя его очищающи,
Елма же предан быти глаголется,
Та же и сам ся предади пишется.
И бесов ты невернейший
Или и жидов несмысленнейший;
Подобишися убо и бесов невернейшим
И июдей быти безумнейшим.
Тем же лучше ти бе июдейски обрезоватися
И от бесов стужатися и смущатися,
Подобаше бо первее человеку искусившуся
И искусом соблюдения заповеди свершившуся.
58. Богослова, в новую неделю
Зде же нову песнь и житие поставляюще,
Аще убо пребывше в добрем и преспевающе,
Присно что добрых обновляюще,
Ради преспевания прилагающе,
Бежим благорумянства, да тя не победит доброты похотение
Лукавне зрети и прозирати, яко умножение и оскудение.
Тако и очи в веждах прикровени да будут,
И ниже блудная зрения жало души да движут.
Но убо к благим словесем да отверзаетъся,
К злым же и к прелестным словесем да затворяетъся.
Твориши, еже и ти, иже и камение грызут,
А метнувшаго не вредят,
Зане, яко же есть сущим под игом часть, —
Лукавную и прелюбодейную сласть.
Сиянии боитеся силнейшаго,
Иже высоких престол вышшаго.
Силнии, убо глаголет, бога бойтеся,
На менших и убогих не возноситеся!
Помогай лежащему, да востанет от падения,
Утешай сия попечением в сопротивно проложения.
Аще и многащи кто падет, то не разбиется.
А кто вознесет себе в гордости, толико смирится.
Не явишися тощ предо мною,
Но — аще что добро нося с собою.
Вчера бо беяше позорьник,
Днесь же явишися разумник;
Когда в том же деянии пребывати и стояти
Просит бо ти, заповед сохранити,
Ни по единой вере право ступая,
Но по божии вере и по временной изнемогая.
Зане имяше держащыя тя еретики,
Времени сего держа на ушию себе шепотники.
Аще бо бы не изънемогал,
Не бы удобь ся прелагал,
Яко некоим оружием иных сеча и укаряя,
А вчера упивател и в пьянстве пребывая.
Днесь окаяем от божественнаго пророка Амоса,
Что Гнезнонскаго епископа[399] бывша от дворския немощи
Не всякому животному, еже смеятися,
Нам вместо тех, еже радоватися и веселитися.
вернуться
398
Григорий Нисский — ранневизантийский церковный деятель, писатель, богослов (ок. 335 — ок. 394).